א קליין ווערטערביכל פון קאווע שטיבל
ווערטער און אויסדרוקן וואס האבן געלעבט אויף די פארומס – מיט א ציטאט פון די ארכיוון
אשכול
א שמועס אויף א געוויסן ענין, פונעם ערשטן פאסט ביז'ן לעצטן. אויף ענגליש: thread. ווען אן אשכול איז אוועק פון זיין ענין, האט מען אים "אפגעטיילט" אין א נייעם אשכול.
זר זהב (2012): דער אשכול וועט גאנץ שנעל אונטערגיין, אזוי ווי דיין ערליכער שכן אין שול וואס רעדט קיין ווארט ארויס פון מויל. (דער אשכול האט דערנאך באקומען 206 תגובות.)
אראומע / פה-סח
די נעמען פון די יום-טוב אויסגאבעס פון קאווע שטיבל. "אראומע" (סוכות תשע"ה) – ווי עס זעט אויס, א שפיל-ווארט אויף "ארומע", א גוטער שמעק, ווי פון א פרישער קאווע; "פה-סח" (פסח תשע"ה) – לויט דעם באקאנטן דרש "פה סח", א מויל וואס רעדט.
כוכב (2014): וואס קענען מיר צושטעלן לכבוד יום טוב? אפשר נעמען מיר זיך צוזאם, און א צען שרייבער דא נעמען זיך אונטער אן ארטיקל.
לייק
דער קנעפל אונטער א פאסט, וואס מיינט "עס געפעלט מיר" – און די סאמע ווערטפולסטע מטבע אויפ'ן פארום.
שמעקעדיג (2014): מיר וועלן האבן אן אייגענע היימישע וואלוטע, וואס וועט זיך רופן "לייקס". דער עולם וועט שווער ארבעטן צו פארדינען לייקס.
מאחורי
דער קורצער נאמען פונעם פארום "מאחורי הפרגוד": א פארמאכטער פארום הינטער די קוליסן, וואס נישט יעדער האט געקענט זען.
לבי במזרח (2013): אדער איז דאס עפעס וואס ווערט נאר דיסקוטירט אין מאחורי?
ניק
דער נאמען מיט וועלכן א מעמבער שרייבט, אנשטאט זיין אייגענעם נאמען. א גוטער ניק איז א האלבע תגובה.
שמעקעדיג (2014): ווער עס האט מורא פון גילוי, וועט נישט דארפן אנטפלעקן זיין עכטן נאמען – מ'קען אים רופן אויף זיין ניק. אפילו צו דער תורה וועט מען אויסרופן אויפ'ן ניק.
Sent from my ... using Tapatalk
א שורה וואס האט זיך אליין צוגעקלעבט צו פאסטס וואס זענען געשריבן געווארן פון א טעלעפאן. אויפ'ן פארום איז זי געווען אזוי געווענליך, אז קיינער האט זי שוין נישט באמערקט.
ליטוואק פון בודאפעסט (2016): האסט אויך רעכט, נאר וויבאלד מען רעדט פון איינעם וואס געלט איז נישט זיין תכלית, קען ער באשטיין צו פארלירן א חלק פון זיין ריוח, צו זיין דער העלד וואס ראטעוועט ארעמעלייט. Sent from my HTC Desire 510 using Tapatalk
שטיבל
קאווע שטיבל אליין – פון זיינע מעמבערס גערופן מיט ליבשאפט, קורץ און ווארעם.
שמעקעדיג (2014): דער בית המדרש פון שטעטל וועט זיך רופן "שטיבל", על שם אונזער זאפטיגן שטיבל, וואס האט אונז צוזאמגעברענגט און אויסגעפארעמט.