דער אבן עזרא נעמט אן על פי פשוטו של מקרא אז אברהם אבינו איז געבוירן געווארן אין אור כשדים, זיין ראיה איז פון דעם פסוק (בראשית יא כח) "וימת הרן על פני תרח אביו, בארץ מולדתו באור כשדים".
דער רמב"ן איז שטארק חולק אויף דעם, ווייל פון דעם פסוק איז בכלל נישט דא קיין ראי' אויף אברהם, דא שטייט אז אור כשדים איז געווען די געבורטס-שטאט פון הרן, עס איז בכלל נישט מוכרח אז אברהם אבינו איז אויך דארט געבוירן.
ווען אברהם אבינו האט געשיקט אליעזר צו טרעפן א ווייב פאר זיין זוהן יצחק, האט אים אברהם אזוי געזאגט (בראשית כד ד): "כי אל ארצי ואל מולדתי תלך, ולקחת אשה לבני ליצחק". און צו וואו האט אים אברהם אבינו געשיקט? נישט קיין אור כשדים, נאר אברהם האט געשיקט אליעזר קיין ארם נהרים עיר נחור, וואס דאס איז בכלל נישט "אור כשדים".
אברהם אבינו איז געווען פון די אייניקלעך פון 'שם בן נח', די כשדיים זענען געווען אייניקלעך פון חם. חז"ל זאגן אונז (בבא בתרא צא ע"א) אז אברהם איז געבוירן געווארן אין כותא. דער רמב"ם (מורה נבוכים ח"ג כט) ברענגט א ראי' צו דעם חז"ל פון ספרי האומות.
נאר פון דעם נביא ישעיה (כג יג, ועי' ברד"ק שם) איז משמע אז די כשדיים האבן אסאך ארומגעוואנדערט, זיי האבן איינגענומען שטחים און שפעטער זענען געקומען אנדערע וואס האבן פארטריבן די כשדיים, אזוי איז געגאנגען חוזר חלילה, ווען מ'האט זיי פארטריבן זענען זיי געגאנגען ווייטער און כובש געווען דארט. מחמת דעם אין שפעטערע תקופות האט מען גערופן ארם נהריים מיט'ן נאמען 'ארץ כשדים', ווייל זיי זענען דארט אנגעקומען און זיך דארט באזעצט פאר א לענגערער תקופה.
אלזא, הרן איז געבוירן אין דעם ארגינעלן אור כשדים, וואס די תורה דערמאנט, משא"כ אברהם אבינו איז געבוירן געווארן אין 'כותא' וואס דאס איז אין דער געגענט פון ארם נהריים, וואס אין א שפעטערער תקופה האט מען דאס גערופן 'ארץ כשדים', אבער דאס איז בכלל נישט דער ארגינעלע 'אור כשדים'.